Мне было 18 гадоў, калі я даведалася, што цяжарная. Я сустракалася з хлопцам на 2 гады старэйшым за мяне. Я была ахвярай таго самага жорсткага абыходжаньня, аб якім шмат пішуць у кнігах і ад якога ўсё заракаюцца, усё спадзяюцца, што з імі гэта ня здарыцца.
Мне было забаронена мець зносіны з сяброўкамі. Кола тэм, якія я магла абмяркоўваць са сваёй сям'ёй, быў рэзка абмежаваны. Я павінна была адмовіцца ад усіх і за ўсяго, акрамя яго. Калі я не рабіла таго, што ён мне казаў, ён мяне караў. Калі я не тэлефанавала яму чатыры разы на дзень, каб даць справаздачу, дзе я і чым займаюся - ён мяне караў. Вось, як я жыла. Я была няшчасная і фізычна нездаровая. Пры росце 168 см і вазе менш за 45 кг , з абцягнутымі скурай косткамі я была якой заўгодна, толькі не здаровай. Але ён казаў, што любіць, і я, верачы ці не, заставалася разам з ім.
Я паліла па дзве пачкі цыгарэтаў на дзень, пакуль аднойчы мяне не пачало ад іх ванітаваць, і я стала паліць значна меньш. Аднойчы я села за стол і намалявала спячага дзіцяці. У той момант я зразумела, што цяжарная. Адразу ж патэлефанавала сяброўцы, яна адвезла мяне ў жаночую кансультацыю, і там мае падазрэньні атрымалі пацверджаньне. У той час я здымала маленькую кватэрку напалам з братам. Вярнуўшыся дадому, я патэлефанавала свайму хлапцу на працу і паведаміла яму навіну. Ён неадкладна прымчаўся да мяне з пяццю рознымі тэстамі на цяжарнасць і прымусіў мяне правесці іх ў яго прысутнасці (зневажальна). Усе пяць апынуліся станоўчымі. На наступны дзень ён прыйшоў да мяне, калі я была адна дома. Ён пачаў угаворваць мяне зрабіць аборт. Ён тлумачыў, што я занадта слабая, кааб выношваць дзіцяці, казаў, што калі я пагаджуся на аборт, ён застанецца са мною: «Я ці гэта». Я адказала, што яму давядзецца сысці. Тады ён сказаў, што сам зробіць мне аборт. Ён паваліў мяне на ложак, адною рукою схапіў мяне за горла, а другою падрыхтаваўся стукнуць мяне ў жывот. Я выкруцілася, ускочыла і пабегла да дзвярэй. Я бегла і крычала, як мне здавалася, гадзіну, перш чым ён дагнаў мяне і шпурнуў аб дзверы. У гэты момант вярнуўся мой брат і выкінуў яго на лесвіцу.
З тых часоў я яго ня бачыла й ня чула. Я ня ўпісала яго імя ў родавы сэртыфікат. Я ніколі не прасіла аб аліментах, таму што, шчыра кажучы, ні за якія грошы я не пагадзілася б мець зносіны з ім.
Цяжарнасць была кашмарам з УГД кожныя два тыдні. Доктар падазраваў, што мая дачка не атрымлівае дастаткова харчаваньня, што ў яе не растуць ногі, што ў яе, магчыма, будуць заганы фізычнага і разумовага развіцця. Рэкамендацыі былі адназначныя: «перапыніць цяжарнасць», «пазбавіцца ад «плоду». Я нарадзіла вельмі разумную, ідэальна складзеную дзяўчынку. Яна вельмі высокая, і ў яе ногі, што называецца, ад вушэй. Я вельмі задаволеная, што не надавала значэньня дасягненьням тэхналёгіі.
Маёй дачцэ нядаўна споўнілася пяць гадоў, і паверце мне: мацярынства - маё жыццё. Часам я азіраюся назад, на тыя часы, калі мы толькі што вярнуліся з радзільні, і смяюся, калі ўспамінаю дні, калі я клала яе спаць у зімовым камбінезоне, таму што мне няма чым было заплаціць за ацяпленьне. Спачатку ў нас анічога ня было, акрамя адзін аднаго: ні тэлевізара, ні машыны, ня было нават ложка. Толькі мы, захутаныя ў коўдры і зімовую вопратку, каб сагрэцца. Цяпер у мяне паважаная праца ў буйной кампаніі. У нас ёсць усё, што трэба. У мяне свая кватэра. Нядаўна я купіла новую машыну. Усім дзяўчатам, якія гатовыя здацца, я хачу сказаць: ня трэба здавацца. Я моцна стаяла на нагах і дасягнула поспеху нягледзячы ні на што. Мая дачка - найвялікшы дар з усіх, якія я атрымлівала ў сваім жыцці. Рашэньне супраць аборту для мяне - гэта ня столькі выратаваньне жыцця дзіцяці, колькі выратаваньне майго уласнага жыцця. Мая дачка - мой анёл, яна выратавала мне жыццё. Дзе б я была цяпер, калі б не яна? Ратуючы сваё дзіцяці, ты ратуеш самую сябе і адкрываеш для сябе магчымасці, пра якія раней і не здагадвалася. Маё сэрца разрывалася, калі я чула, як яна моліцца: «Дарагі Ісус, дзякуй, што ты паўстаў з мёртвых. Калі ласка, дай мне добрага тату. Дзякуй. Амінь».
Верце ў Бога, і Ён заўсёды будзе побач, пры кожным рашэньні, якое вы прымаеце, пры кожным вашым кроку... Дарэчы, у маёй дачкі цяпер ёсць выдатны тата, яе малітвы былі пачутыя! Гасподзь пачуе і вашыя малітвы!
